Messi qizil kartochka olgani va taqdirlash marosimiga bormaganini izohladi

Argentina milliy jamoasi etakchisi Lionel Messi Kopa Amerikaning bronza medali bilan taqdirlash marosimida qatnashmadi.
 
O‘yindan keyin u bu qarorini quyidagicha izohladi.
«Men podiumga bormadim, chunki biz korruptsiyaning bir qismiga aylanib qolmasligimiz kerak. Butun turnir davomida Argentinaga nisbatan hurmatsizlik ko‘rsatildi. Biz bundan ko‘prog‘iga ham erisha olgan bo‘lardik.
Bronza uchun bo‘lgan o‘yin ham, xuddi Braziliyaga qarshi kechgan uchrashuv kabi, bizning eng yaxshi o‘yinlarimizdan biri bo‘ldi. Qaytaraman, korruptsiya va hakamlar futbolni buzib qo‘ydi va muxlislarni undan zavq olish imkonidan mahrum etdi», – deya Messining so‘zlarini keltirdi Argentina milliy jamoasi matbuot xizmati.
Leo, shuningdek, bronza uchun Chiliga qarshi kechgan o‘yinning (2:1) 37-daqiqasida raqib yarimhimoyachisi Gari Medel bilan kelisha olmay qolganiga ham izoh berib o‘tdi. Bu holat uchun ularning har ikkisiga ham qizil kartochka ko‘rsatilgan edi.
«Qizil kartochka? Ikkalamizga ham «sariq» ko‘rsatish etarli bo‘lardi. Muhimi, jamoamiz musobaqani yaxshi yakunladi. Hakamlar o‘sha epizodni baribir diqqatliroq bo‘lib qayta ko‘rib chiqishlari kerak, deb o‘ylayman.
Turnir biz uchun yakunlandi va biz uni boshimizni tik tutgancha tark etyapmiz. Men bor kuchini berib o‘ynagan jamoam bilan faxrlanaman. Erishganlarimizga haqqoniy baho berishadi, deb umid qilaman. Jamoa xarakter ko‘rsatib, musobaqani ijobiy notada yakunlay oldi», – dedi Lionel Messi.
Argentinaliklar sardoridan jamoa bosh murabbiyi Lionel Skaloni borasida ham fikr bildirishni so‘rashdi.
«Skaloni? U ham butun jamoa bilan birga o‘sib bordi. Turnir yakuniga borgan sayin biz kerakli darajadagi uyg‘unlik va yaxshi o‘yin ritmini topib oldik», – deb javob qildi u.
Manba: tribuna.uz

07.07.2019, 13:11 115 0

Fikringizni bildirishingiz uchun saytdan ro'yhatdan o'tigan yoki profilga kirgan bo'lishigiz kerak
×Yopish